हरिः ओम्

Sloka Text in Telugu , Kannada, Gujarati, Devanagari, English

ಸುಂದರಕಾಂಡ.
ಅಥ ಚತುರ್ವಿಂಶಸ್ಸರ್ಗಃ

ತತಸ್ಸೀತಾಮುಪಾಗಮ್ಯ ರಾಕ್ಷಸ್ಯೋ ವಿಕೃತಾನನಃ|
ಪರುಷಂ ಪರುಷಾ ನಾರ್ಯ ಊಚುಸ್ತಾಂ ವಾಕ್ಯಮಪ್ರಿಯಮ್ ||1||

ಕಿಂ ತ್ವಂ ಅನ್ತಃಪುರೇ ಸೀತೇ ಸರ್ವಭೂತಮನೋಹರೇ|
ಮಹಾರ್ಹಶಯನೋಪೇತೇ ನ ವಾಸಮನುಮನ್ಯಸೇ||2||

ಮಾನುಷೀ ಮಾನುಷಷ್ಯೈವ ಭಾರ್ಯಾ ತ್ವಂ ಬಹುಮನ್ಯಸೇ|
ಪ್ರತ್ಯಾಹಾರ ಮನೋ ರಾಮಾನ್ ನ ತ್ವಂ ಜಾತು ಮರ್ಹಸಿ||3||

ತ್ರೈಲೋಕ್ಯ ವಸುಭೋಕ್ತಾರಂ ರಾವಣಂ ರಾಕ್ಷಸೇಶ್ವರಮ್|
ಭರ್ತಾರ ಮುಪಸಂಗಮ್ಯ ವಿಹರಸ್ವ ಯಥಾ ಸುಖಮ್||4||

ಮಾನುಷೀ ಮಾನುಷಂ ತಂ ತು ರಾಮಮ್ ಇಚ್ಚಸಿ ಶೋಭನೇ|
ರಾಜ್ಯಾತ್ ಭ್ರಷ್ಟಂ ಅಸಿದ್ಧಾರ್ಥಂ ವಿಕ್ಲಬಂ ತ್ವ ಮನಿಂದಿತೇ||5||

ರಾಕ್ಷಸೀನಾಂ ವಚಃ ಶ್ರುತ್ವಾ ಸೀತಾ ಪದ್ಮನಿಭೇಕ್ಷಣಾ|
ನೇತ್ರಾಭ್ಯಾಂ ಅಶ್ರುಪೂರ್ಣಾಭ್ಯಾಂ ಇದಂ ವಚನಮಬ್ರವೀತ್ ||6||

ಯದಿದಂ ಲೋಕವಿದ್ವಿಷ್ಟ ಮುದಾಹರಥ ಸಂಗತಾಃ|
ನೈತನ್ ಮನಸಿ ವಾಕ್ಯಂ ಮೇ ಕಿಲ್ಬಿಷಂ ಪ್ರತಿಭಾತಿ ಮೇ||7||

ನ ಮಾನುಷೀ ರಾಕ್ಷಸಸ್ಯ ಭಾರ್ಯಾ ಭವಿತುಮರ್ಹತಿ|
ಕಾಮಂ ಖಾದತ ಮಾಂ ಸರ್ವಾ ನ ಕರಿಷ್ಯಾಮಿ ವೋ ವಚಃ||8||

ದೀನೋ ವಾ ರಾಜ್ಯಹೀನೋ ವಾ ಯೋ ಮೇ ಭರ್ತಾ ಸ ಮೇ ಗುರುಃ|
ತಂ ನಿತ್ಯಮನುರಕ್ತಾಽಸ್ಮಿ ಯಥಾ ಸೂರ್ಯಂ ಸುವರ್ಚಲಾ||9||

ಯಥಾ ಶಚೀ ಮಹಾಭಾಗಾ ಶಕ್ರಂ ಸಮುಪತಿಷ್ಟತಿ|
ಅರುಂಧತೀ ವಶಿಷ್ಠಂ ಚ ರೋಹಿಣೀ ಶಶಿನಂ ಯಥಾ||10||

ಲೋಪಮುದ್ರಾ ಯಥಾಽಗಸ್ತ್ಯಂ ಸುಕನ್ಯಾ ಚ್ಯವನಂ ಯಥಾ|
ಸಾವಿತ್ರೀ ಸತ್ಯವಂತಂ ಚ ಕಪಿಲಂ ಶ್ರೀಮತೀ ಯಥಾ||11||

ಸೌದಾಸಂ ಮದಯಂತೀವ ಕೇಶಿನೀ ಸಗರಂ ಯಥಾ|
ನೈಷಧಂ ದಮಯಂತೀವ ಭೈಮೀ ಪತಿಮನುವ್ರತಾ||12||

ತಥಾಽಹಂ ಇಕ್ಷ್ವಾಕು ರಾಮಂ ಪತಿಮನುವ್ರತಾ|
ಸೀತಾಯಾ ವಚನಂ ಶ್ರುತ್ವಾ ರಾಕ್ಷ್ಯಸಃ ಕ್ರೋಧಮೂರ್ಛಿತಾಃ||13||

ಭರ್ತ್ಸಯನ್ತಿ ಸ್ಮ ಪರುಷೈಃ ವಾಕ್ಯೈ ರಾವಣಚೋದಿತಾ|
ಅವಲೀನಃ ಸ ನಿರ್ವಾಕ್ಯೋ ಹನುಮಾನ್ ಶಿಂಶುಪಾದ್ರುಮೇ||14||

ಸೀತಾಂ ಸಂತರ್ಜಯನ್ತೀನಾಮ್ ರಾಕ್ಷಸೀನಾಂ ಸ ಶುಶ್ರುವೇ||
ತಾಮಭಿಕ್ರಮ್ಯ ಸಂಕ್ರುದ್ಧಾ ವೇಪಮಾನಾಂ ಸಮನ್ತತಃ||15||

ಭೃಶಂ ಸಂಲಿಲಿಹುರ್ದೀಪ್ತಾನ್ ಪ್ರಲಮ್ಬಾನ್ ದಶನಚ್ಚದಾನ್|
ಊಚುಶ್ಚ ಪರಮಕ್ರುದ್ಧಾಃ ಪ್ರಗೃಹ್ಯಾಶು ಪರಶ್ವಧಾನ್||16||

ನೇಯಮರ್ಹಸಿ ಭರ್ತಾರಂ ರಾವಣಂ ರಾಕ್ಷಸಾಧಿಪಮ್|
ಸಾ ಭರ್ತ್ಸ್ಯಮಾನಾ ಭೀಮಾಭಿ ರಾಕ್ಷಸೀಭಿರ್ವರಾನನಾ||17||

ಸಾ ಭಾಷ್ಪಮುಪಾರ್ಜನ್ತೀ ಶಿಂಶುಪಾಂ ತಾಮುಪಾಗಮತ್|
ತತಸ್ತಾಸಾಂ ಶಿಂಶುಪಾಂ ಸೀತಾ ರಾಕ್ಷಸೀಭಿಃ ಸಮಾವೃತಾ||18||

ಅಭಿಗಮ್ಯ ವಿಶಾಲಾಕ್ಷೀ ತಸ್ಥೌ ಶೋಕಪರಿಪ್ಲುತಾ|
ತಾಂ ಕೃಶಾಂ ದೀನವದನಾಂ ಮಲಿನಾಮ್ಬರಧಾರಿಣೀಮ್||19||

ಭರ್ತ್ಸಯಾಂ ಚಕ್ರಿರೇ ಸೀತಾಂ ರಾಕ್ಷಸ್ಯ ಸ್ತಾಂ ಸಮನ್ತತಃ|
ತತಸ್ತಾಂ ವಿನತಾ ನಾಮ ರಾಕ್ಷಸೀ ಭೀಮದರ್ಶನಾ||20||

ಅಬ್ರವೀತ್ಕುಪಿತಾಕಾರಾ ಕರಾಳಾ ನಿರ್ಣತೋದರೀ|
ಸೀತೇ ಪರ್ಯಾಪ್ತ ಮೇತಾವತ್ ಭರ್ತುಸ್ನೇಹೋ ನಿದರ್ಶಿತಃ||21||

ಸರ್ವತ್ರಾತಿಕೃತಂ ಭದ್ರೇ ವ್ಯಸನಾ ಯೋಪಕಲ್ಪತೇ|
ಪರಿತುಷ್ಟಾಸ್ಮಿ ಭದ್ರಂ ತೇ ಮಾನುಷಸ್ತೇ ಕೃತೋ ವಿಧಿಃ||22||

ಮಮಾಪಿ ತು ವಚಃ ಪಥ್ಯಂ ಬ್ರುವನ್ತ್ಯಾಃ ಕುರು ಮೈಥಿಲಿ|
ರಾವಣಂ ಭಜ ಭರ್ತಾರಂ ಭರ್ತಾರಂ ಸರ್ವ ರಕ್ಷಸಾಮ್||23||

ವಿಕ್ರಾನ್ತಂ ರೂಪವನ್ತಂ ಚ ಸುರೇಶ ಮಿವ ವಾಸವಮ್|
ದಕ್ಷಿಣಂ ತ್ಯಾಗಶೀಲಂ ಚ ಸರ್ವಸ್ಯ ಪ್ರಿಯದರ್ಶನಮ್||24||

ಮಾನುಷಂ ಕೃಪಣಂ ರಾಮಂ ತ್ಯಕ್ತ್ವಾ ರಾವಣ ಮಾಶ್ರಯ|
ದಿವ್ಯಾಙ್ಗರಾಗಾ ವೈದೇಹೀ ದಿವ್ಯಾಭರಣಭೂಷಿತಾ||25||

ಅದ್ಯ ಪ್ರಭೃತಿ ಸರ್ವೇಷಾಂ ಲೋಕಾನಾಂ ಈಶ್ವರೀ ಭವ|
ಅಗ್ನೇ ಸ್ಸ್ವಾಹಾ ಯಥಾ ದೇವೀ ಶಚೀಽವೇಂದ್ರಸ್ಯ ಶೋಭನೇ||26||

ಕಿಂ ತೇ ರಾಮೇಣ ವೈದೇಹೀ ಕೃಪಣೇನ ಗತಾಯುಷಾ|
ಏತದುಕ್ತಂ ಚ ಮೇ ವಾಕ್ಯಂ ಯದಿ ತ್ವಂ ನ ಕರಿಷ್ಯಸಿ||27||

ಅಸ್ಮಿನ್ ಮುಹೂರ್ತೇ ಸರ್ವಾಸ್ತ್ವಾಂ ಭಕ್ಷಯಿಷ್ಯಾಮಹೇ ವಯಮ್|
ಅನ್ಯಾತು ವಿಕಟಾ ನಾಮ ಲಮ್ಬಮಾನಪಯೋಧರಾ||28||

ಅಬ್ರವೀತ್ ಕುಪಿತಾ ಸೀತಾಂ ಮುಷ್ಟಿ ಮುದ್ಯಮ್ಯ ಗರ್ಜತೀ|
ಬಹೂನ್ ಅಪ್ರಿಯರೂಪಾಣಿ ವಚನಾನಿ ಸುದುರ್ಮತೇ||29||

ಅನುಕ್ರೋಶಾನ್ ಮೃದುತ್ವಾ ಚ್ಚ ಸೋಢಾನಿ ತವ ಮೈಥಿಲಿ|
ನ ಚ ನಃ ಕುರುಷೇ ವಾಕ್ಯಂ ಹಿತಂ ಕಾಲಪುರಸ್ಕೃತಮ್||30||

ಅನೀತಾಸಿ ಸಮುದ್ರಸ್ಯ ಪಾರಂ ಅನ್ಯೈರ್ದುರಾಸದಮ್|
ರಾವಣಾನ್ತಃ ಪುರಂ ಘೋರಂ ಪ್ರವಿಷ್ಟಾ ಚಾಪಿ ಮೈಥಿಲಿ||31||

ರಾವಣಸ್ಯ ಗೃಹೇ ರುದ್ಧಾ ಮಸ್ಮಾಭಿಸ್ತು ಸುರಕ್ಷಿತಾಮ್|
ನತ್ವಾಂ ಶಕ್ತಃ ಪರಿತ್ರಾತು ಮಪಿ ಸಾಕ್ಷಾತ್ ಪುರನ್ದರಃ||32||

ಕುರುಷ್ವ ಹಿತ ವಾದಿನ್ಯಾ ವಚನಂ ಮಮ ಮೈಥಿಲಿ|
ಅಲಂ ಅಶ್ರುಪ್ರಪಾತೇನ ತ್ಯಜ ಶೋಕಮನರ್ಥಕಮ್||33||

ಭಜ ಪ್ರೀತಿಂ ಚ ಹರ್ಷಂ ಚ ತ್ಯಜೈತಾಂ ನಿತ್ಯ ದೈನ್ಯತಾಮ್|
ಸೀತೇ ರಾಕ್ಷಸರಾಜೇನ ಸಹ ಕ್ರೀಡಾ ಯಥಾಸುಖಮ್||34||

ಜಾನಾಸಿ ಯಥಾ ಭೀರು ಸ್ತ್ರೀಣಾಂ ಯೌವನಮಧ್ರುವಮ್|
ಯಾವನ್ನ ತೇ ವ್ಯತಿಕ್ರಾಮೇತ್ ತಾವತ್ ಸುಖಮವಾಪ್ನುಹಿ||35||

ಉದ್ಯಾನಾನಿ ಚ ರಮ್ಯಾಣಿ ಪರ್ವತೋಪವನಾನಿ ಚ|
ಸಹ ರಾಕ್ಷಸರಾಜೇನ ಚರ ತ್ವಂ ಮದಿರೇಕ್ಷಣೇ||36||

ಸ್ತ್ರೀ ಸಹಸ್ರಾಣಿ ತೇ ಸಪ್ತ ವಶೇ ಸ್ಥಾಸ್ಯಂತಿ ಸುನ್ದರೀ|
ರಾವಣಂ ಭಜ ಭರ್ತಾರಂ ಭರ್ತಾರಂ ಸರ್ವ ರಕ್ಷಸಾಮ್||37||

ಉತ್ಪಾಟ್ಯ ವಾತೇ ಹೃದಯಂ ಭಕ್ಷಯಿಷ್ಯಾಮಿ ಮೈಥಿಲಿ|
ಯದಿ ಮೇ ವ್ಯಾಹೃತಂ ವಾಕ್ಯಂ ನ ಯಥಾವತ್ ಕರಿಷ್ಯಸಿ||38||

ತತಶ್ಚಣ್ಡೋದರೀ ನಾಮ ರಾಕ್ಷಸೀ ಕ್ರೋಥಮೂರ್ಛಿತಾ|
ಭ್ರಾಮಯನ್ತೀ ಮಹಚ್ಚೂಲ ಮಿದಂ ವಚನಮಬ್ರವೀತ್||39||

ಇಮಾಂ ಹರಿಣ ಲೋಲಾಕ್ಷೀಂ ತ್ರಾಸೋತ್ಕಮ್ಪಿಪಯೋಧರಾಮ್|
ರಾವಣೇನ ಹೃತಾಂ ದೃಷ್ಟ್ವಾ ದೌಹೃದೋ ಮೇ ಮಹಾನಭೂತ್||40||

ಯಕೃತ್ಪ್ಲೀಹ ಮಥೋತ್ಪೀಡಂ ಹೃದಯಂ ಚ ಸಬನ್ಧನಮ್|
ಅನ್ತ್ರಾಣ್ಯಪಿ ತಥಾ ಶೀರ್ಷಂ ಖಾದೇಯ ಮಿತಿ ಮೇ ಮತಿಃ||41||

ತತಸ್ತು ಪ್ರಘಸಾ ನಾಮ ರಾಕ್ಷಸೀ ವಾಕ್ಯಮಬ್ರವೀತ್ |
ಕಂಠಮಸ್ಯಾ ನೃಶಂಸಾಯಾಃ ಪೀಡಯಾಮ ಕಿಮಾಸ್ಯತೇ||42||

ನಿವೇದ್ಯತಾಂ ತತೋ ರಾಜ್ಞೇ ಮಾನುಷೀ ಸಾ ಮೃತೇತಿ ಹ |
ನಾತ್ರ ಕಶ್ಚನ ಸಂದೇಹಾಃ ಖಾದತೇತಿ ಸ ವಕ್ಷ್ಯತಿ ||43||

ತತಸ್ತ್ವಜಾಮುಖೀ ನಾಮ ರಾಕ್ಷಸೀ ವಾಕ್ಯಮಬ್ರವೀತ್ |
ವಿಶ ಸ್ಯೇಮಾಂ ತತ ಸ್ಸರ್ವಾಃ ಸಮಾನ್ ಕುರುತ ಪೀಲುಕಾನ್|44||

ವಿಭಜಾಮ ತತಃ ಸರ್ವಾ ವಿವಾದೋ ಮೇ ನ ರೋಚತೇ|
ಸೇಯ ಮಾನೀಯತಾಂ ಕ್ಷಿಪ್ರಂ ಲೇಹ್ಯಾ ಮುಚ್ಚಾವಚಂ ಬಹು||45||

ತತಶ್ಶೂರ್ಪಣಖಾನಾಮ ರಾಕ್ಷಸೀ ವಾಕ್ಯಮಬ್ರವೀತ್ |
ಅಜಾಮುಖ್ಯಾ ಯದುಕ್ತಂ ಹಿ ತದೇವ ಮಮರೋಚತೇ||46||

ಸುರಾ ಚಾನೀಯತಾಂ ಕ್ಷಿಪ್ರಂ ಸರ್ವ ಶೋಕವಿನಾಶಿನೀ|
ಮಾನುಷಂ ಮಾಂಸಂ ಆಸಾದ್ಯ ನೃತ್ಯಾಮಽಥ ನಿಕುಮ್ಭಿಲಾಮ್||47||

ಏವಂ ಸಂಭರ್ತ್ಸ್ಯಮಾನಾ ಸಾ ಸೀತಾ ಸುರಸುತೋಪಮಾ|
ರಾಕ್ಷಸೀಭಿಃ ಸುಘೋರಾಭಿ ರ್ಧೈರ್ಯಮುತ್ಸೃಜ್ಯ ರೋದಿತಿ||48||

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ಆದಿಕಾವ್ಯೇ ವಾಲ್ಮೀಕೀಯೇ
ಚತುರ್ವಿಂಶತ್ ಸಹಸ್ರಿಕಾಯಾಂ ಸಂಹಿತಾಯಾಮ್
ಶ್ರೀಮತ್ಸುಂದರಕಾಂಡೇ ಚತುರ್ವಿಂಶಸ್ಸರ್ಗಃ||

||ಓಂ ತತ್ ಸತ್||

|| om tat sat||